Menaxhimi i projektit dhe studimi i mjedisit për Projektin "Mullinj me Erë" - Në Qarkun Korçë

Në përpjekjet e tij drejt mbrojtjes së mjedisit, Instituti i Kërkimeve Urbane (URI) ka studiuar burimet potenciale të energjive të rinovueshme, të cilat janë duke u shpërndarë në mbarë botën me shpejtësi. Përpjekjet dhe investimet e bëra nga shumica e shteteve të botës janë në drejtim të zbatimit të Protokollit të Kiotos. Respektimi i këtij protokolli do të shtojë përpjekjet për të gjetur dhe përdorur burime të reja energjie që kanë efikasitet dhe njëkohësisht kanë një impakt shumë të vogël në mjedis, për të mos thënë impakt "zero".

URI është një OJQ pionier që filloi me nismën e ngritjes në Shqipëri të një parku energjetik, që shfrytëzon energjinë e erës. Krahasuar me efektet në mjedis të burimeve të energjisë tradicionale, efektet mjedisore të energjisë së erës janë relativisht të vogla. Fuqia e erës nuk konsumon karburant dhe nuk prodhon ajër të ndotur, në dallim nga burimet e energjisë të prodhuar nga mbetjet. Energjia e konsumuar për të prodhuar dhe transportuar materialet për të ndërtuar një central të energjisë së erës, është e barabartë me energjinë e re e prodhuar nga centrali, vetëm brenda disa muajsh nga fillimi i operacionit.

Qëllimi i projektit është realizimi i një centrali elektrik të emërtuar "KAPPET", për prodhimin industrial të energjisë elektrike me burim eolik (me erë), të përbërë nga 75 deri në 82 (38 + 44) gjeneratorë ajrorë, me fuqi nominale njësi të parashikuar ndërmjet 2 MW dhe fuqi nominale të përgjithshme prej 150 plus 10% MW.

Nga punimet topografike janë trasuar 99 pika për vendosjen e aerogjeneratorëve, respektivisht 48 në "Nënzona Petrushe" dhe 51 në "Nënzona Kapshticë", një pjesë e të cilave do të shërbejnë si pika alternative për të plotësuar maksimalisht sasinë e MW të energjisë elektrike të prodhuar, si dhe për efekt të mundësisë së aksesit rrugor dhe të problemeve me pronësinë e terrenit, nëse do të ketë të tilla.

Projekti "KAPPET" do të kontribuojë në përmbushjen e detyrimeve të Shqipërisë për nxitjen e teknologjisë së pastër dhe reduktimin e gazeve ndotës të efektit serrë të emetuar në atmosferë, siç synohet nga Protokolli i Kiotos, duke zvogëluar sasinë e CO2 me 303 milion kg në vit.

Projekti "KAPPET" do të sjellë reduktimin e presionit mbi pyjet, etj. Ky projekt do të ketë ndikim pozitiv në uljen e ritmeve të erozionit të zonës, përmirësimin e cilësisë dhe sasisë së ujërave sipërfaqësore dhe nëntokësore, në përmirësimin e gjendjes së zonave të mbrojtura etj. Ai mbështet në mënyrë të drejtpërdrejtë përmbushjen e 4 nga 7 synimet themelore të strategjisë kombëtare të energjisë (SKE).

Në përputhje me veçoritë fiziko-gjeografike të zonës, numrit dhe tipologjisë së aerogjeneratorëve dhe konfiguracionit gjeometrik të instalimit të tyre në territor, është vlerësuar që prodhimi vjetor i Centralit me erë "KAPPET do të jetë jo më pak se 383.000 MWh/vit.

Vija e kufirit të jashtëm të zonës së studiuar, që zë një sipërfaqe prej 4.125 ha ku do të ndërtohen  mullinjtë me erë, i korrespondon një niveli minimal akustik, studiuar dhe vlerësuar të jetë në nivelin e 40 db.

IKU ka menaxhuar aktivitetet e projektit, duke kryer disa studime, ku më i rëndësishmi ka qenë studimi mjedisor.