Projekti për Rritjen e Besueshmërisë së Kredidhënies (PRBK)

Banka Evropiane për Rindërtim dhe Zhvillim (BERZH) në kuadër të financimit të investimeve kapitale të bashkisë me anë të përdorimit të huave synon forcimin  e sistemit të menaxhimit financiar dhe rritjen e besueshmërisë në funksion të dhënies së huave për bashkinë. Për këtë qellim, BERZH ka nisur Projektin për Rritjen e Besueshmërisë së Kredidhënies (PRBK) për Bashkinë e Tiranës duke përzgjedhur SGI Studio Galli Ingegneria SpA (SGI) dhe homologet e saj SST Consult, Institutin e Kërkimeve Urbane (IKU), dhe Agjencinë për Zhvillim Ekonomik të Qëndrueshëm (AZHEQ) si konsulentë për të dhënë asistencë teknike për bashkinë e Tiranës në fushën e menaxhimit financiar. Objektivi i Projektit për Rritjen e Besueshmërisë së Kredidhënies për Bashkinë e Tiranës është nxjerrja e një teprice të mjaftueshme buxhetore, sigurimi i parave të mjaftueshme për të realizuar shlyerjen e borxheve dhe shërbimin e huasë (duke përfshirë interesin) dhe stabilizimi e ruajtja e kësaj situate për periudhën e ripagimit të huasë. Metoda për arritjen e qëllimit presupozon që forcimi i besueshmërisë për kredidhënie do të arrihet nëpërmjet përmirësimit të menaxhimit financiar pas vënies në përdorim të praktikave më të mira ndërkombëtare të menaxhimit financiar bashkiak. Projekti për Rritjen e Besueshmërisë së Kredidhënies për Bashkinë e Tiranës është në linjë me kuadrin e Qeverisë së Republikës së Shqipërisë për decentralizimin fiskal. Qeveria e Republikës së Shqipërisë ka formuluar një projekt ligj për huamarrjen e qeverisjes vendore i cili pritet të miratohet nga Kuvendi i Shqipërisë. Si pasojë, Projekti për Rritjen e Besueshmërisë së Kredidhënies për Bashkinë e Tiranës konsiderohet nga kjo e fundit jo vetëm si një projekt për asistencë teknike në funksion të huamarrjes, por, edhe si një projekt i forcimit të kapacitetit të menaxhimit financiar të Bashkisë së Tiranës përpara hyrjes në tregjet e brendshme dhe të jashtme financiare. Instrumenti i ri i financimit të investimeve kapitale me anë të përdorimit të huave do të bëjë të mundur që bashkia të shpejtojë investimet në infrastrukturë dhe zhvillim. Kjo do të rezultojë në një rritje domethënëse të cilësisë së shërbimit infrastrukturor duke sjellë, në këtë mënyrë, përmirësimin e standardeve të jetesës së qytetarëve.