Projekti për Forcimin e Rrjeteve Rinore për Rritjen e Pjesëmarrjes në Hartimin dhe Zbatimin e Politikave Rinore

Në kuadër të mbështetjes dhe angazhimit të organizatave dhe grupeve rinore në proceset vendim marrëse, Ministria e Kultures, Turizmit, Rinisë dhe Sporteve, me mbështetjen e organizatës UNICEF, hartoi dhe organizoi një set trajnimesh 2 ditore në qytetet Tiranë, Durrës dhe Elbasan. Instituti i Kerkimeve Urbane (URI) i përzgjedhur si zbatues i këtij aktiviteti, realizoi një trajnim sa më të kuptueshëm dhe ndëraktiv për pjesëmarrësit. Temat e pregatitura nga ekspertët e URI-t prezantonin konceptet bazë dhe themelore të angazhimit të komponentit rinor në proceset vendim marrëse duke pasur si synime të përgjithshme:

• Aftësimin e organizatave rinore për përmbushjen sa më efikase të misionit për të cilin janë ngritur
• Organizatat rinore të funksionojnë si përfaqesues të grupeve që përfaqësojnë
• Drejtuesit e organizatave rinore fitojnë aftësi specifike në fushën e Lidershipit dhe te Shkrimit te Projekteve.

Fushat kryesore ku u përqëndrua trajnimi ishin:

1. Lidershipi rinor (roli dhe profili i një lideri rinor)
2. Si të shkruajmë një projekt (konceptimi, formulimi dhe paraqitja e një projekti)
3. Advokimi i organizatave rinore (Si të mbrojmë idetë, idealet dhe të percjellim mesazhet tona në nivelet vendim marrëse).

Aktiviteti përfundoi me një sërë rekomandimesh si domosdoshmeria e organizimit më të shpeshtë të këtyre aktiviteteve, të vlefshme jo vetëm për përvetësimin e dijeve mbi konceptet moderne Europiane për funksionimin efikas të organizatave rinore, por edhe për shkëmbimin e ideve dhe alternativave për gjenerimin e politikave konstruktive në shërbim të misionit të tyre. Gjithashtu, të rinjte shprehen vlefshmërinë e parimeve të Lidershipit dhe Avokimit të cilat do t’u shërbenin jo vetëm për formimin e pergjithshëm të tyre por edhe në praktikat e afërta si punesimi mbas studimeve, realizimi i një karriere progresive e të bazuar në parimet e ndershmërisë, etj. Gjithashtu, nje emërues i përbashkët i këtyre organizatave ishte dhe domosdoshmëria e prezantimit dhe trajtimit të kuadrit ligjor të BE-së me fokus të veçantë mbi pjesëmarrjen rinore si element shtytës i shoqërisë.