Mbrojtje Rajonale e Mjedisit, Veprim dhe Kohezion në Ballkanin Perëndimor (REA)

Koha e realizimit: 26 muaj

Data e fillimit: Shtator 2009                                                          Data e përfundimit: Dhjetor 2010

Financuar nga: Ambasada e Mbretërisë së Hollandës

Në kuadër të REA-s mori jetë edhe Lëvizja Bells, e cila u mbështet nga programi rajonal për mjedisin i Ambasadës së Mbretërisë së Hollandës. Misioni i Lëvizjes Bells është të jetë lider i zhvillimit të qëndrueshëm në vendet e Ballkanit Perëndimor. Përmes nismave të ndryshme, veprimit dhe edukimit, anëtarët e Bells-it nxisin qytetarët e Ballkanit Perëndimor të kërkojnë të drejtën e tyre për një mjedis të shëndetshëm dhe standarde më të mira ekonomike dhe sociale. Anëtarët e Lëvizjes Bells, besojnë se nuk ka limite dhe kufinj administrativë për çështjet e mjedisit, nuk ka ngjyra të partive politike dhe vetëm nëpërmjet dialogut, bashkëpunimit dhe përputhshmërisë së legjislacionit mund të arrihen ndryshime pozitive në këtë fushë.

Disa nga aktivitetet kryesore të Lëvizjes Bells në Shqipëri

- Në 7 dhjetor, 2009, Instituti i Kërkimeve si partneri kombëtar i projektit REA dhe Lëvizjes Bells, me pjesëmarrjen e Ambasadorit të Mbretërisë së Hollandës në Tiranë dhe Kryetarin e Komisionit Parlamentar për Aktivitetet Prodhuese, Tregtinë dhe Mjedisin në Kuvend, organizoi një konferencë shtypi  për t’i përçuar një mesazh të përbashkët Parlamentit, Qeverisë, partive politike, shoqërisë civile, dhe aktorëve të tjerë të interesit, gjithashtu edhe Konferencës së Kombeve të Bashkuara mbi Ndryshimet Klimatike (COP 15), që të marrin masa për veprim të menjëhershëm në përmirësimin e mjedisit për të shmangur efektet e ndryshimeve klimatike.

- Në 17 Shkurt, 2010, u organizua tryeza për krijimin e Koalicionit Kombëtar të Mjedisit në Shqipëri. Në takim u realizua me sukses ngritja e këtij organi që përbëhet nga përfaqësues të ndryshëm, përfshirë Kuvendin me anëtarë të Partisë Demokratike dhe Partisë Socialiste; përfaqësues nga qeverisja vendore me kryetarë bashkish, shoqëria civile, media, përfaqësues të biznesit dhe njerëz të tjerë me influencë. Rreth 64 anëtarë të Koalicionit Kombëtar të Mjedisit nënshkruan një Memorandum Mirëkuptimi, duke treguar interes në krijimin e një forumi jetëgjatë për diskutimin e çështjeve mjedisore.

- Në datën 8 Prill, Koordinatori Kombëtar i Lëvizjes Bells, zoti Edlir Vokopola,  u takua me Kryetarin e Bashkisë së Orikumit, z. Kanan Braho, dhe disa anëtarë të Këshillit Bashkiak të qytetit, për t’u prezantuar standardet e Bells-it dhe qëllimet e projektit REA. Z. Braho nënshkroi Memorandumin e Bashkëpunimit me Lëvizjen Bells, duke përkrahur interesin në çështjet mjedisore.

- Më 29 Prill, Kryetari i Bashkisë së Korçës, z. Niko Peleshi, u njoh me standardet e Lëvizjes Bells dhe gjithashtu, nënshkroi një Memorandum Bashkëpunimi për të treguar dëshirën dhe përkushtimin e të dyja palëve për të punuar së bashku në çështjet mjedisore.

- Në datat 22-23 Prill, 2010, Lëvizja Bells iu bashkua aktiviteteve të ndryshme që kishin të bënin me Ditën e Tokës. Koordinatori Kombëtar bëri prezantime të zgjeruara të standardeve të Lëvizjes Bells dhe punës së Koalicionit Kombëtar të Mjedisit në Universitetin Polis dhe Universitetin Bujqësor të Tiranës. Në këto takime mori pjesë edhe Ministri i Mjedisit, Pyjeve dhe Administrimit të Ujërave, z. Fatmir Mediu.

- Një tjetër aktivitet shumë i rëndësishëm i Koordinatorit Kombëtar ishte ai i datës 28 prill 2010, ku objektivat e Lëvizjes Bells u bënë të njohura në një mbledhje të Komisionit Parlamentar të Aktiviteteve Prodhuese, Tregtisë dhe Mjedisit në Kuvendin Shqiptar. Fokusi i takimit ishte prezantimi i standardeve të Bells për anëtarët e komisionit, të cilët treguan një interes të veçantë për projektin REA.

- Në 13 maj, 2010 u mbajt tryeza kombëtare e Koalicionit Kombëtar të Mjedisit, e organizuar, nga Instituti i Kërkimeve Urbane dhe Lëvizja Bells në bashkëpunim me Ministrinë e Mjedisit, Pyjeve dhe Administrimit të Ujërave, për të diskutuar Strategjinë Kombëtare të Menaxhimit të Mbetjeve dhe Planin Kombëtar për Menaxhimin e Mbetjeve në Shqipëri. Me pjesëmarrjen e mbi 80 vetëve, tryeza theksoi se dokumentet kanë një rëndësi të veçantë për shkak të gjendjes së dobët në të cilin kryhet aktualisht ky proces në vendin tonë.

- Në 5 qershor 2010, Lëvizja Bells organizoi një koncert rock në Ditën Botërore të Mjedisit, ku morën pjesë mbi 250 njerëz. Ky koncert u zhvillua njëkohësisht edhe në 5 vendet e tjera të Ballkanit Perëndimor, më qëllim për t’iu adresuar vendimmarrësve shqiptarë rëndësinë që po marrin çështjet e mjedisit. Gjatë koncertit më shumë se 300 qytetarë nënshkruan Deklaratën e Qytetarëve: Një dokument i cili u kërkon vendimmarrësve, politikanëve dhe aktorëve të interesit të tregojnë më shumë vëmendje ndaj mjedisit.

Disa nga rezultatet e REA-s dhe Lëvizjes Bells janë:

- Rritja e bashkëpunimit ndër-sektoral në vendet e Ballkanit Perëndimor lidhur me çështjet e mjedisit
- Rritja e bashkëpunimit rajonal dhe shkëmbimi i eksperiencave për politikat dhe nismat që lidhen me mjedisin në rajonin e Ballkanit Perëndimor
- Rritja e njohurive të aktorëve të interesit dhe qytetarëve të Ballkanit perëndimor mbi vlerat dhe standardet mjedisore të BE-së

www.bellsmovement.org